II KEDADA CICLOTURISTA DA CORUÑA
01-11-09
Pouco a pouco fómonos xuntando no Burgo unha morea de ciclistas chegados de toda a comarca, mesmo de Ferrol, para facer o percorrido pensado en principio para levar de forma relaxada aproveitando para falar e disfrutar da paisaxe costeira. E con bastante puntualidade puxémos en marcha a longa ringleira de ciclistas e á altura do Carballo xa nos recibiu a agardada chuvia, en principio suave pero con poucas trazas de mellorar e despois a medida que avanzabamos, cada vez máis forte e acompañada de refachos de vento lateral que movían as bicicletas perigosamente dun lado para outro.
No alto de Campolongo a cousa estaba moi dura e a baixada ata Pontedeume houbo que facela con tino e quentando os freos para conseguir parar abaixo antes de coller cara a Perbes pola costa. O vento seguía zoando por entre das árbores e por enriba hoxe había un tráfico bastante abondoso pola estreita estrada costeira, o que fixo que houbese que trocar a charla amigable por unha concentración extrema para tentar de rematar a xornada sen incidentes que lamentar.
En Miño Julito que hoxe fixo de chofer do coche basoira, tíñanos preparado o avituallamento na beira da praia e paramos o xustiño para comer algo e seguir a ruta antes de enfriar, máis que polo frío pola falta de actividade empapados como estabamos. E así en grupetas máis ou menos improvisadas fomos chegando de novo ó Burgo, aínda que a xente non estaba pola labor de agardar alí e cada un tirou directamente cara a súa casa para recibir unha merecida ducha quentiña.
Os aventureiros tolos fomos Abraham, Abuín, Dani, David, Estíbaliz, Iván, Javi, J. Segade, Karina, Marante, María, Moncho, M. Segade, Novás, Vasco e Vicente coma cicloturistas. Tamén estaba Pablito coa súa bici de ciclocrós.
E mención especial para Julio que non atopou chofer para o coche basoira e tivo que resignarse a ver os touros dende a barreira e facer de fotógrafo, asistente e garda de tráfico. Nun principio amosaba unha cara de circunstancias pero ó longo do día e coñecendo o pouco que lle gusta a auga, estou seguro que pensou, carallo da que me librei !!!.
Xornada sen incidentes que reseñar, así que se pode considerar exitosa que é o importante.
